வீடு

தனக்குள் அந்நியமாகும் வீடு
அகழாய்வு செய்துகொள்ள விரும்புவதில்லை.
முகிழ்க்கும் தரையிலிருந்து
தடங்கள் சுவர்களில் ஏறிச் செல்வதை
வேடிக்கை பார்த்துக் கொண்டிருக்கும்.
ஓடி
நடந்து
பறந்து
குதித்து
பாதங்களைத் தவிர வீட்டுடன் அதிகமாகப் பேச
வேறு யார் இருக்கிறார்கள்.
வெகுநாளைக்குப் பிறகு
தூசியைத் துடைக்க வருகிறவன்
கதவுகளைத் திறக்கும் போது
பாதங்களை மட்டுமே பார்க்கிறது வீடு.
தூசியைத் துடைக்கும் முன்பு
படியும் தடங்களில் மூழ்கும்
பழைய பாதங்களைத்
திகட்டத் திகட்ட முத்தமிடுகிறது.
குதிக்கும் சத்தத்தைப் பதிவு செய்ய
முகமெல்லாம் காதுகளை வரைகிறது.
ஏதோ ஓர் இடைவெளியில்
காற்று வந்து நிறைந்தும்
தடங்கள் இன்றியே செல்கிறது.
விளக்கொளியில் வீட்டைப் பார்க்கிறவன்
அணைத்தலின் பொருட்டு காத்திருக்கிறான்.
மறுபடியும் வீட்டைப் பூட்டி
அவன் செல்லும் போது
உள்ளே கதவைத் தட்டும் தடங்கள்
பாதங்களாக வளர்ந்து
தானாகவே
நடக்க ஆரம்பிக்கின்றன.


சொல்வனம் ஆகஸ்ட் 2019