நித்திரைத் தெரு
நித்திரைத் தெருவுக்கு வெளியே
கழிவறை செல்லும் வழியில்
இருபுறமும் திறந்திருக்கும்
கதவுகளுக்கு நடுவே நிற்கிறாள்.
கண் கூசும் வெளிச்சம்
இறக்கிவிடுவதற்கு
ஆயத்தப்படுத்துகிறது.
அபார்ட்மெண்ட்
கதவிலக்கங்கள் பதிக்கப்பட்ட
சன்னமாக எரியும் நீல விளக்குகளில்
எழுபத்தி இரண்டு வீடுகள்
ஆழ்ந்த நித்திரையில்
குறட்டை விடும் ஒலி
துடித்துக் கொண்டிருக்கிறது.
அடுத்த ஊரில் இறங்கி
நித்திரையற்று
நின்று கொண்டிருக்கும்
தெருவின் பெட்டிக்கு
செல்லும்படி
அதிகமாக சப்தமிடுகிறார்
பரிசோதகர்.
பெர்த்திலிருந்து
எழ விரும்பாதவர்கள்
கால்களால்
வேடிக்கை பார்த்துவிட்டு
மீளவும்
நித்திரையில் புகுகிறார்கள்.
இறக்கிவிடும் போது
முதுகில் அறைகிறது
படாரென்று மூடிக்கொள்ளும்
நித்திரைத் தெருவின் வாசற்கதவு.
ஓடு ஓடெனத் துரத்த
கருணையற்று ஒளிரும்
ஆரஞ்சு சிக்னலை நோக்கி
கை நீட்டுகிறது குழந்தை.
Comments
Post a Comment