காற்றின் குளியல்

குளியலறைக் கதவை
சரியாக மூடாமல் வந்து விட்டேன்
Push - Pull தெரியாத காற்று
முட்டிக்கொண்டே இருந்தது

எப்படியாவது
உள்ளே வைத்து மூடிவிடு
அல்லது
திறந்து விடு என அடம்பிடித்தது

மூடிவைத்த பிறகு
காற்று குளிப்பது போல இருந்தது
திறந்து பார்த்தால்
நீர் மட்டுமே தளும்பியது
வாளியில் 

கதவை மூடி உட்கார்ந்த போது
பார்க்கமுடியாத குளியல்
மீண்டும் மீண்டும்
தொந்தரவு செய்தது

நீரை எடுத்து
மேலே ஊற்றிக் கொண்டும்
வழிந்தோடும் சப்தம் இல்லை
முதலில் குளித்த காற்று இல்லை
இது வேறு என்று
படபடத்தது
உள்ளே கதவு

மறுபடியும் கதவைத் திறக்காமல்
மொட்டைமாடியில் நின்று
ரகசியமாக எட்டிப் பார்த்தேன்
காகமொன்று எச்சமிட்டபடி
கா கா கா கா என்றது

வாசகசாலை மார்ச் 2020