கறிக்குழம்பு மணக்கவில்லை

என்னது 
கறிக்குழம்பு தயார் செய்யும் போது 
ஊண் உருகும் 
நெய் மணக்கவில்லையா ? 
நாசிகளே 
நீங்களாகவே குதித்து  
உடைந்து விடுங்கள் 
பிடுங்கி எறிந்தால் அவமானமாகிவிடும் 
திடீரெனக் கதவடைப்பது 
உங்களுக்குப் பழக்கம் இல்லையே 
வாசனைக்கால்களை 
கழற்றிவைத்துவிட்டு 
உள்நுழையும் 
மூச்சுக்குத் தெரிந்திருக்கிறது எல்லாமும்
அவசர அவசரமாக 
காலணிகளை மாட்டி 
கால்களைத் தொட்டு ருசிக்கிறது நாக்கு 
துளியும் உப்பில்லை
உள்ளே உருளுகிறது 
காய்ந்த ஆற்றுமணல் 
கசப்பு கூட இல்லாதது 
கொன்றுவிடத் தூண்டுகிறது 
நாக்கைப் பிடுங்கிக் கொள்ளலாம்
யாராவது சொல்வதற்குள் 
நீங்களே விழுந்து விடுங்களேன் 
சுவை மணம் தெரியாது 
புதிய நோயின் அறிகுறி இதுவென்று 
மருத்துவர் சொன்னபின் 
நாக்கை இழுத்துக் கொண்டேன் 
நாசிகளுக்கு பதிலாக 
ஒரு பெரிய உள்மூச்சு.

வாசகசாலை - டிசம்பர் - 2020