நெய்தல் பாடல்

கடலுக்கு மிக அருகில்
இருக்கிறது என் வாழ்க்கை

நனைவதற்கு நகர்ந்தேன்
கை கால்களில் விலங்குகள்

கடல்நீர் குடிக்க இதழ் திறக்கிறேன்
பிளாஸ்திரியால் ஒட்டுகிறார்கள்

கண்களால் அலை குடிக்கிறேன்
கறுப்புத் துணியால்
இறுக்கிக் கட்டுகிறார்கள்

காதுகளில் அலையடித்துப் பேசுவதை
யாரோ பார்த்து உளவு சொன்னபின்
மணல் அள்ளிப் புதைக்கின்றனர்
இரண்டு காதுகளையும்

உப்புக்காற்றின் ஈரமணம் நுகர்கிறேன்
நெய்தல் மண்ணின் மகனென அறிகையில்
நாசிக்குள் நுழைகின்றன
தீக்குச்சிகள்

நிற்கிறது மூச்சு
இப்போது
கடலுக்கு மிக அருகில்
இருக்கிறது அவன் பிணம்


- வாசகசாலை ஜூலை 2020