அவசரம் இல்லாத நாள்

கழற்றி வைக்கப்பட்டிருக்கிறது கொண்டை 

விசிலடித்துக் கொண்டு ஆடும் ஆட்டம் இல்லை.

தலைக்கு மேலே உடலைப் பரப்பி 

இஷ்டத்துக்கு தூங்குகிறது குக்கர்.

வயிற்றுப் பகுதியின் கூர் பிளேடுகள் 

அனுபவித்திராத சொகுசுடன் 

மூடியற்று 

வான் பார்த்திருக்கிறது மிக்ஸி ஜார்.

கேஸ் அடுப்புக்கு 

சொல்லவியலா ஆனந்தம் 

திருகியார்கள்  இன்னும் 

வரவில்லையென்று.

ஒல்லிக்குச்சி லைட்டரைப் பார்த்து 

எகத்தாளம் வேறு. 

சம்பிரதாயமாகி அனிச்சையாய்த் 

தொட்டெடுக்கும்

தேயிலைத்தூள் டப்பாவுக்கு 

அவ்வளவு குஷி 

தன் மணத்தில் 

தான் மட்டும் 

குளித்துக் கொண்டிருக்கிறது. 

தட்டி அடிப்பவர்கள் இல்லை 

கட்டிக் கொண்டு 

களிக்கூத்தாடுகின்றன 

லஞ்ச் பாக்ஸ்கள்.

எங்கெங்கு காணினும் 

விடுதலையின் பரிசுகந்தம் .

காலை உணவு சமைக்க

அவசரமில்லாத நாள் 

வாரி மடியிலமர்த்திக் கொள்ள 

வெகுநேரமாக அமர்ந்திருந்தோம்.